Ch.10 彩斗之魂

在科學省保衞戰一役後，網路世界再度回復平靜；另一邊廂，一眾網路救星們也都恢復自己的工作。炎山繼續為IPC的業務而埋頭苦幹，雷火返回夏洛國繼續執行任務，熱斗及美露則繼續他們的中學生活......總之，各有各忙。

當然，恢復正常生活對熱斗而言，意味著一些家常便飯的事情再度出現：上學遲到被罰、忘了做功課、只顧看漫畫而被洛克人督促説教......雖說這都是一些糟事，但再糟也好過花費無限精力與敵人們周旋。

很快又到了週末。對熱斗來說，看來這還真是平淡的一週呢。不過，他並沒有想到，接下來所發生的事情將完全改寫這一週的平淡。

「起身喇，熱斗！」

一如既往，熱斗對自家領航員的呼喚充耳不聞。

在深深吸過一口氣後，伴隨著的是這位藍色領航員的咆吼；聲音從書桌上的PET沖出，產生極為強勁的聲浪，把熱斗震得從床上給彈了起來。

「日日都要咁做，真係辛苦你喇，洛克人。」在PET的空間內，看著洛克人一副上氣不接下氣的疲態，身旁的得意露不禁輕輕苦笑。

「嗶嗶嗶...」意識到這是信息通知，洛克人便打開查看，並把它轉達予熱斗。

「熱斗，媽媽傳送咗則訊息畀你呀。佢想你幫手搵本舊相簿畀佢呀。」

「舊相簿？」熱斗立即走到相簿櫃前仔細看看。

「媽媽有冇話本相簿咩顏色㗎？」

「佢話應該係藍色㗎。」

「藍色？係呢個喇！」熱斗很快便找出相簿。

「平時媽媽一向都好細心嗰喎，點解佢今日又會咁大意嘅？」

隔著螢幕，熱斗與洛克人互相凝視，然後不禁微微一笑。

「叮噹！」

在門鈴響過後，熱斗便打開門户一看，原來那是媽媽。

「要麻煩你真係唔好意思呀，熱斗。」

「唔好咁講啦，媽媽。不過點解你會突然間用到舊簿嘅？」

「因為今晚我會同我班中學同學食飯呀。」春香笑盈盈地對兒子說：「大家約好咗交換相簿一齊睇，一齊回到中學時，我又點可以錯過呢？」

「原來係咁。」熱斗不禁苦笑，心想：相簿這個玩意還真是只有老一輩才會用的。

「媽媽，你講嘅相簿係咪就係呢個喇？」

「係呀！熱斗果然叻仔喎！」春香歡喜地摸摸兒子的頭髮。

「我唔細㗎喇，媽媽。」這讓熱斗感覺十分尷尬，臉也在這時給漲紅起來。

「時間都唔早喇，不如我去煮個早餐畀你食啦。」看見兒子為難的表情，春香也不勉強他了。在放下舊相簿以後，她便走進廚房工作。

「咦，呢張係...？」

熱斗走到相簿櫃前，拾起這張丟在地上的照片查看。他認得照片中其中一個嬰兒便是自己，但另一個嬰兒究竟是誰呢？他怎樣也想不起來。

「洛克人，你覺得呢個BB係邊個嚟呢？」

「吓？我...我都唔知喎，可能...係醫院病房裏面其他父母嘅BB卦。」

「係呀...」熱斗想了想，然後說：「睇番以前自己啲相，先發現原來以前我係咁得意嗰喎。」

「哈哈！」

其實洛克人早已知悉那名男嬰的身份，但因為特別的原因，他不能把真相告訴熱斗，只好假裝不知。一直在旁的得意露也察覺到洛克人的異樣，感覺他好像對某件事情有所隱瞞；只有素來觀察力較弱的熱斗絲毫沒有察覺。

「媽媽，張相另一個BB係邊個嚟㗎？」雖然熱斗沒有明察秋毫的本事，但卻有著強烈的求知慾。

「熱斗，媽媽宜家好忙㗎，不如遲啲先問啦。」洛克人急忙地嘗試阻止，但看來並不成功。

「我都唔係好忙啫，就畀我睇睇...呢張相？！」只見春香開始緊張起來，但兒子就在她面前，身為母親總不能對兒子説謊的。只見她深深吸了一口氣，然後對兒子說：「對唔住呀，熱斗。媽媽怕你太早知道會唔開心，所以一直都冇同你講過呢件事。其實，呢位就係你嘅雙胞胎哥哥，光彩斗。」

「我嘅...雙胞胎...哥哥？！」頓時熱斗的內心像是被投下一枚深水炸彈，整個人被炸得目瞪口呆。

「但因為患上一種先天性疾病，佢喺出世之後一年就離開咗人世。」説到這裡，春香聲淚俱下，淚水一點一點地由雙眼滑下，沾濕了她的衣領。

「唔好咁啦，媽媽。呢個唔係你嘅錯嚟。」

「熱斗...」春香努力忍住淚水，向兒子説：「陣間你可唔可以跟我去一個地方呀？」

「一個...地方？」

......正午，秋原町紀念墓園......

熱斗帶著透過複製實體而實體化的洛克人及得意露，跟著媽媽來到了秋原町市內的墓園。有別於一般市中心地帶，這裡並沒有繁華鬧市的囂聲、汽車與高樓，有的只有一片綠油油的草地及幽靜的環境。

明白到洛克人怕鬼的弱點，熱斗便先讓他及得意露在外面等候，自己則跟著母親進入墓園。

一般來說，墓園總是給人一種可怕、神袐的感覺。然而，當真正來到這裡，熱斗才真正明白墓園並不是那樣恐怖；相反，這清靜的環境卻能讓自己洗滌內心的混亂及煩燥，給自己一種莫名的舒𣈱感。

「熱斗，呢個就係你哥哥嘅墓碑。」

看著母親指著的墓碑上刻著哥哥在世的時間：1992.6.10 - 1993.12.20，熱斗心中不禁哀歎：哥哥果然是英年早逝呀！若果現在他還在世的話，究竟會是怎樣呢？

在墓園外，洛克人正為可能遇見幽靈而害怕得冷汗直冒；相反，在旁的得意露卻擺出一副十分期待的樣子。

他們並沒有預計錯誤。不久後一個幽靈狀的半透明身影從遠處向洛克人那邊飛去。看到幽靈的影子，一向懼怕靈怪的洛克人立即找棵老樹躲了起來；相反，得意露卻顯得十分雀躍，急不及待地上前與「幽靈」對話。

「你好呀，幽靈哥哥！我叫得意露呀！」

「你...你好。」相比得意露的主動熱誠，「幽靈」反倒顯得含羞及被動。

「點解你會喺度出現嘅，幽靈哥哥？」

「...不如你直接叫我個名吖。」被這樣稱呼，「幽靈」心中有點不是味兒。「我叫光彩斗，多多指教！」

「彩斗？...哦，原來你就係熱斗嘅哥哥喇？」沒預計到自己竟能與熱斗的哥哥交談，得意露心情特別興奮。「熱斗今日都有嚟探你呀，不如等我叫佢出嚟啦！」

「多謝你呀，得意露，我諗...都係唔使喇。」明白到此舉可能會嚇壞了弟弟和母親，彩斗回絕了得意露的好意。「只要可以知道細佬嘅生活情況，我就心滿意足喇。」

「你話熱斗呀...，佢都生活得幾好㗎！......」得意露滔滔不絕地描述熱斗的生活近況，而彩斗也聽得津津有味。

經過一大堆描述後，彩斗總算明白熱斗的生活狀況。「多謝你咁詳細嘅描述呀，得意露。不過，你所講嘅領航員，係...？」

「佢叫洛克人呀！佢宜家喺嗰度呀，不如我去叫佢過嚟吖！」

彩斗往前一看，只見那棵樹後躲藏著一個藍色的身影；其全身皆被樹幹所遮蓋，只餘下頭盔那青藍色的一角仍能被勉強看見。

「我諗都係唔使喇！」彩斗笑了笑說，他明白自己直接露面只會令對方更為害怕，無助彼此交流。「不過，你可以幫我一個忙嘛？」

「嗯？」

「其實我咁早就離開呢個世界，根本就冇盡到哥哥照顧細佬嘅責任。我覺得自己好對熱斗唔住。但係，照你頭先所講，洛克人的確係代替我去完成哥哥嘅職責。」說到這裡，彩斗頓了一頓，然後繼續說：「所以，請你幫我同洛克人講聲多謝吖。」

「包喺我身上啦，彩斗哥哥！」

「多謝你呀，得意露。」聽見得意露的承諾，彩斗滿意地笑了笑。「時候都唔早喇，有機會嘅話我哋再見啦，得意露。」說畢，彩斗那半透明的軀體便漸漸消失。

「再見喇，彩斗哥哥！」

另一邊廂，熱斗與母親春香亦剛完成拜祭儀式。

「希望哥哥你能夠保祐家人嘅生活，乃至世界嘅安全啦。」隨著熱斗祈禱完畢，他與母親便準備離開墓園。「我哋一定會再嚟探你㗎！」他們不謀而合地想著。

當他們走出墓園，只看見洛克人怯懦地躲在樹後及得意露燦爛的笑容。

「你哋頭先真係見到幽靈呀？」

「係呀，熱斗！」得意露笑盈盈地説：「我見到彩斗哥哥呀！」

「見到...彩斗？」在旁的春香感到十分詫異。

「哈哈哈哈，唔係吓嘛？」熱斗卻不以為然，他認為得意露所說的也許只是創意的想像罷了。

「喂喂，你唔係真係咁驚吓嘛，洛克人。」

「熱...熱斗呀...」

「乜洛克人咁驚幽靈嘅咩？」得意露好奇地問。畢竟在他的記憶中，洛克人係一個什麼也不怕的強者。

「對唔住呀，得意露。其實我冇資格做你大哥哥。」

「做乜咁講呀，洛克人？」

「其實...我係好怕鬼㗎......自從一次喺科學省嘅網路世界內遇到幽靈狀嘅病毒之後，我就對幽靈有種不可磨滅嘅陰影。嗰次我差啲就被刪除，好彩爸爸及時救番我咋。」

「原來洛克人你有過咁可怕嘅經歷㗎？」在旁的熱斗恍然大悟，那怪不得洛克人會那麼害怕幽靈了。

「但係...身為大哥哥，我係唔應該呃你㗎......對唔住呀，得意露。」

「其實，我都唔應該搵呢啲嚟嚇你，去加大你嘅心理陰影㗎。」得意露也頓時覺得自己以前有錯。「對唔住呀，洛克人。」

「既然大家都互相道歉咗，咁我哋不如暫時放低呢啲唔開心嘅事啦！」春香對那三位男孩笑著說：「就等我番去為大家炮製下午茶啦！」

「太好喇，多謝媽媽！！！」一想到有美味可口的佳餚，熱斗便興奮大叫起來。

在那棵老樹的另一邊，一個神秘人物在背後奸笑著。

「洛克人，光熱斗，好快就會係你哋嘅死期喇，哈哈哈哈哈！！！」



上一章              下一章