在網路世界的一角，有人正為某事而大發雷霆。
「可惡！明明成功在望，最後竟然畀你壞我好事？！」
原來他是因飛船被毀一事而感到生氣呢。
「睇住嚟啦！凡係逆我意嘅，必定遭受戰悚、痛苦同滅亡！！」
返回熱斗家那邊。即使已經日上三竿，熱斗仍然賴在床上，不願起來。
「熱斗，係時候起身喇！」
「就畀我瞓多五分鐘啦，洛克......咦？」熱斗這時才發現那並不是洛克人那把熟悉的嗓音。他轉身看著放置在書桌上的PET，只見一個身體呈黃色的領航員從PET中投射出來。
「早晨呀，熱斗！」那名領航員朝熱斗微笑道。
「你係......？」熱斗對眼前的領航員感到有點熟悉，但卻不知道該如何稱呼他。現場氣氛不免顯得有點尷尬。
「你唔記得我喇，熱斗？」看見他一臉茫然的樣子，這位領航員不禁泛起了陣陣的哀傷感；淚水亦在此時漸漸湧出，沾濕了這位領航員的眼框。
「唔好喊呀......」縱使熱斗嘗試平服這位領航員的情緒，但看來並不成功。
正當熱斗感到不知所措之際，一把熟悉、柔和的嗓音由PET中響起。
「...你唔係應承過我，以後唔會再喊嘅咩？」
「熱斗...熱斗已經...已經...唔記得我...嗚......」只見那名領航員伏在洛克人的肩膀上哇哇大哭。
「洛克人，佢係...？」
「熱斗呀......」洛克人有點無奈地回答：「佢咪係得意露囉。」
「得意露？」熱斗一臉疑惑，覺得好像在哪裡聽過這名字。
「你唔記得五年前嗰位喺比方世界嘅領航員喇？」
「...比方世界...領航員...哦，原來係你！」經過洛克人多番提示，熱斗才回想起五年前那位可愛、好動的嬰兒領航員。
「哈哈哈...認你唔到添...真係唔好意思呀！」明白自己傷了得意露的心，熱斗只好賠笑道歉。然而，這位一頭躺在洛克人肩膀上的領航員卻絲毫沒有理會熱斗。
「得意露？」
「Sh...」洛克人急忙地示意熱斗安靜。他一面緩緩的放下得意露，一面壓低聲線説：「佢瞓咗喇。」
「估唔到宜家嘅佢都依然似隻袋鼠......」想到這一點時，熱斗便忍俊不禁。
「咁佢都幾似你喎！」洛克人亦微笑道，看似有點想揶揄熱斗。
「你唔好亂講喎！我...我邊度似佢呀？」熱斗頓時面紅耳赤，急忙地反駁洛克人。
「我都係講事實咋嘛！」
「你咪多事呀！！」
就這樣，他們倆就在不知不覺間吵了起來。直至門鈴響起，才使這場爭戰得以告終。
「美露、伊朵？」眼見美露與伊朵到來，熱斗便開門歡迎他們。
「你哋有事搵我？」
「我哋嚟係要幫你爸爸將複製實體交畀得意露用㗎。」美露率先開口回應。
「點解連伊朵妳都會知佢返咗嚟嘅？」
「你唔可以睇少我哋綾小路家嘅情報網嗰喎。」這回説話的是伊朵。只見她說畢後，一如既往地自信的抬高了頭；額頭頓時亮起了一度閃光，使熱斗不得不以單手保護雙眼。
「咁宜家得意露喺邊呀？」還是美露帶回正題。
「佢瞓著咗。」洛克人回應道。
忽然間，一度光線從熱斗耳旁的PET中投射出來，把眾人嚇了一跳。
「你哋好呀！」原來那位正是得意露。
「你唔係瞓著咗嘅咩？」熱斗連忙問得意露。
「我只係小睡片刻啫，唔使驚。」得意露的臉上堆滿了笑容，剛才的事情彷佛沒有發生過。
「係喇，你喺比方世界嘅生活幾好嘛？」
「放心啦，熱斗！」得意露微笑著説：「我每一日都過得好充實，都能夠以自己嘅力量幫助有需要嘅人。」
正當熱斗想繼續追問下去之際，美露打斷了他們間的對話。
「不如畀得意露試下用新型複製實體先啦，熱斗。」
「又係喎，差啲唔記得咗呢件事添。」明白自己又變胡塗，熱斗一面苦笑著，一面把得意露及洛克人傳輸至各自的複製實體內。
正當洛克人與得意露同時出現於現實世界之時，忽然傳來一陣空肚子的聲音。
原來是因為熱斗仍未吃早餐，使肚子因空著而咆吼。
「唔好意思呀！我仲未食早餐...嘻嘻嘻...」面對如斯尷尬的場面，熱斗只好紅著臉地賠笑道。
「唔緊要，咁不如宜家一齊去我屋企食野啦。」伊朵興高采烈地提議道。
一想到有精緻、讓人垂涎三尺的蛋糕和甜點，熱斗當然不加思索的答應了。
在餐桌上，正當侍應們忙於準餐具時，得意露提出了一個請求。
「唔該，請問有冇草苺芭菲呀？」
這不禁令眾人們感到好奇，畢竟沒有人會把這些含有冰淇淋的食物當作早餐的。
「早餐食雪糕對腸胃唔好㗎，得意露。」洛克人微笑的對他提醒道。
「冇所謂啦，就要一杯草苺巴菲吖唔該！」
既然主人家不反對，那洛克人亦不好作異議，一切就這樣給定了下來。
當然，準備一切早點需時。為了消磨時間及解悶，眾人便開始詢問得意露的生活近況。
「得意露，你喺比方世界主要嘅工作係咩呀？」首先開口的仍是熱斗。
眾人皆以為他的職業大抵只是學生，但得意露的回答卻令眾人大跌眼鏡。
「我喺比方世界主要負責設計唔同嘅建築物，並為各項工程設計出唔同嘅建造方案。」
「吓？！」眾人不約而同地驚呼。
「咁即係話...你係一個建築設計師？」美露帶點驚訝地猜量著。
「係呀，我同時亦係一個工程師。」得意露面帶笑容地說：「因為我覺得嚟份工作最能夠透過自己嘅力量，幫助重建比方世界。」
「咁宜家比方世界發展成點呀？」美露不禁對比方世界的近況表示關注。
「比方世界已經重建好喇。」得意露面露笑容説：「仲有好多唔同類型嘅建築物相繼落成，就好似政府大樓、摩天大樓、住宅大廈、單棟樓、農村小屋等等。」説到這裡，得意露轉而望向洛克人：「其實我之所以能夠成為建築師，都係源於洛克人你當時教我砌積木。我到宜家都忘記唔到你呀，所以我將政府大樓命名為洛克樓。多謝你呀，洛克人！」
「唔好咁講啦，得意露。」被他這麼一說，洛克人不免感到尷尬，臉也在不知不覺間漲紅起來。
「睇下，你搞到大哥哥怕醜喇。」蘿露笑著對得意露說。這麼一說使洛克人感到更不好意思，臉也漲得更紅了。
「咁你工程師嘅工作又係咩嚟㗎？」還是熱斗帶回正題，化解了自家領航員的蒼態。
「工程師嘅工作主要係計劃唔同嘅建築方案，使到一啲基建項目好似地下鐵路、高速公路等得以順利落成。」提到建築方案，得意露便提及方案中的重點：建造方法。
「以鐵路為例，除咗直接挖掘之外，我哋有時仲要用到凍土挖掘法。」
「早餐已經準備好喇，請大家享用啦！」伊朵的提醒打斷了得意露的話。
「嘩！係草莓芭菲呀！！」能夠首次品嚐眼前大大的一杯芭菲，得意露不免顯得雀躍。「我唔客氣喇！」
「得意露，你啱啱講嘅凍土挖掘法係咩嚟㗎？」
然而，由於已經被眼前的美食完全吸引，得意露並沒有回答熱斗的問題。解答問題的工作也因此落在自家領航員-洛克人的身上。
「凍土挖掘法係一種以冰凍泥土嘅方式進行挖掘嘅方法。」洛克人認真地向自家使用者解釋這種方法的原理及好處。「......原理主要係喺洞口嘅中心放置冷凍管，並將周圍嘅泥土冷卻至零下十到二十度。呢種方法能夠有效解決泥土因水份過多而造成地基沉降或者隧道下塌嘅問題，同時亦令到成個工程更加潔淨。所以呢種方法主要用於喺積水嚴重嘅泥土中建造鐵路隧道。」
「洛克人果然係學富五車呀！」得意露不禁稱讚洛克人。「我最鍾意嘅始終都係洛克人！」
「得意露呀...」
忽然，熱斗、美露同時接到名人先生的急報，指網路之城控制塔的系統完全失控。
「唔好意思啊！洛克人同蘿露有急事要走先喇！」熱斗向伊朵説道。
「唔緊要。」
「美露，咁得意露呢？」在旁的蘿露忍不住問及得意露的去留問題。
明白自己可能妨礙他們工作，得意露笑盈盈的主動回答：「洛克人、蘿露姐姐，你哋出戰啦！我仲想食埋杯草莓芭菲先呀。」
聽到得意露的回答，熱斗他們便放心地把領航員送進網路空間。
「插入，洛克人.exe！資料傳輸！！」
「插入，蘿露！資料傳輸！！」
雖說得意露同意洛克人及蘿露出戰，亦對熱斗他們的對戰技巧充滿信心；但他內心裡卻有種不祥預感。
「你係咪有邊到唔舒服啊，得意露？」看見得意露一副憂心忡忡的樣子，美露帶點關切地問道。
「冇...我冇事。」雖然這樣說，但他總感覺到一種無形的危機已經漸漸迫近洛克人及蘿露他們。
沒有留言:
發佈留言